2013年9月1日 星期日

給未來B2B ── 婚禮,沒什麼是必需的

由籌備到大日子,足足用了近兩年時間,現在婚禮過後,希望將自己的心得同睇法,跟一眾bride-to-be分享。

我一開始搞婚禮,已經知道一個事實,認為自己的婚禮與別不同的,只是新娘自己一人,基本上對其他所有人來說(包括新郎),都是「又去飲一餐」而已。所以個人認為,婚禮是要用心搞,但在十萬個項目上,也要識分莊閒,揀重要的項目來駛錢,要事事完美係無可能,除非你手上有用之不盡的鈔票。

■ 婚禮無一件事或物件是必須必有必做

婚禮不論大小,都係好個人,我唔覺得有乜嘢係必.須.要.有。我唔覺得一定要播成長片段,亦唔覺得一定要有回禮禮物,如果唔中意的話,花球、晚裝甚至婚紗都可以拋棄,只要自己舒服就可以了。最重要是知道自己想要什麼,因為嗰d細節除咗你會留意之後,其餘所有人包括新郎都係' nobody care'。

■ 婚禮無大細之分,只有「搞」同「唔搞」

承上,不過都要老老實實講,喺香港搞婚禮係無大細之分,擺十圍同擺一百圍其實係無分別,只係敬酒時行耐d咁解。之前我都係想婚禮簡單一點,一開始就想做lunch buffet算,但籌備下來,發現lunch同dinner不論價錢同規模都唔差得遠,計過條數,lunch仲要趕到我死死下,因為大部分都係要3至4點完,而且做完lunch,到夜晚都係要食飯,所以到最後我便改了做dinner。

又,承蒙家人的厚愛,每人對我的婚禮都很緊張很熱情,盛情難卻下,基本上到最後我係什麼都做齊,包括過大禮、買唐餅、上頭,仲有拜祖先!!(但別忘記,我係搞西式婚禮 ) 我好慶幸最尾我有做齊,原本我的姑奶及奶奶甚至話可以唔敬茶,後尾先知原來三大長老(尤其老爺奶奶)其實都係想做。因此, 不要高估自己可以抵抗的能力,因為好多嘢都係「不似你預期」。

不過,我都認為,婚禮係好開心嘅回憶,有能力的話,搞好過唔搞。

■ 婚展book嘢,十之八九出事

我身邊所有朋友,包括網上認識的準新娘都係,多數瀨嘢,其中最易出事都係prewedding同租衫。太多見不到的陷阱,建議最好先上網做資料搜集,覺得ok先去婚展book。不過,老實說,基本上而家blog界好紅的vendor都唔會擺婚展,所以……自己衡量下啦。

■ 不要怕加價而早早租衫
我自己就係人辦,我太早租衫,confirm了的裙本原本覺得好特別,但跟住一年因為太多新娘着,變了一條「爛裙」,而且經過一些日子,自己的諗法又改變咗,所以到最後所有嘢都唔同晒,但中間就駛多咗冤枉錢,因為要加錢轉,如果我唔係一早confirm了晚裝唔想浪費,我其實可以全日只係着婚紗,因為我真係好中意我自己的婚紗。

■ 不要大數唔慳,慳細數

基本上成個婚禮,用得最多錢係酒席,起碼佔四成,之後就係攝影、化妝、租衫,所以要控制成本一定係由場地做起,如果呢四個項目係KEEP到,其他你點玩都無問題。個人認為慳埋d手花、襟花,仲有過大禮d濕星嘢就好無謂,嗰d俾你慳到盡有幾多? 好多時DIY比買現成仲貴,不過要求創意的話就另計。

■ 重點消費
事事要求完美者,呢度就唔啱睇。搞婚禮要識分莊閒,除非你係大富之家,如果唔係無可能樣樣都用最靚最好,揀一兩個ITEM你係最最重視,等自己開心吓,其餘的就要面對現實,如果唔係破產都有份。

■ 揀場要留意,不要有太多鏡
之前我都唔為意,後尾同我的攝影師solo吹開水先知,原來d攝影師好憎好多鏡嘅場,因為會反光,打燈好難打,所以各位b2b要注意啦。

■大日子找朋友影相

要找個相熟朋友,當天無無聊聊無嘢做的,可以同你照下相,呢個真係好重要,如果唔係等到頸都長先有相睇。

之前有睇過兩個BRIDES dap 及 whyme 的婚後心得分享,非常有用,那些要點我都不重複說了,大家可以CLICK去睇下。


最後,請一眾新娘子緊記,不要因為一場婚禮,令自己變人見人憎的港女。
Afterall,it is JUST a stupid wedding. What really matter are your husband, family and friends.

一場婚禮,無人欠你的。

沒有留言:

張貼留言