2013年9月1日 星期日

大日子之離奇事件簿(下)

終於,到第三件事。

呢件事好爆 ──我命名佢為「奇情遺失事件」。

結婚當天,我叫咗為人最慬慎的大表姐幫我保管所有金器、人情及財物,揀表姐係因為佢係會計師,而且由細到大都好detail mind,就係嗰種上堂抄的note可以用來貼堂嗰種人。

表姐當天坐reception,所有人情都經佢手,即使來賓親手俾咗我同老公,我地都會俾番表姐,而表姐為了萬無一失,仲會即場拆,寫低幾錢、係支票定禮卷定現金,等我有多d資料做事後點算,而我亦預備咗一個有啪扣嘅人情箱俾佢放錢。

最後,有一封無啦啦唔見咗。

本來,件事就好似無乜特別,都有唔少新人唔見人情,但今次唔見咗呢一封,就好「與別不同」。

首先要俾d background 大家知,封呢封人情嘅親戚,我暫且叫佢做A嬸嬸。

A嬸嬸係我奶奶嗰邊的人,我奶奶嗰邊之前有個阿姨嫁女,又係佢封人情有問題,張支票竟然彈票,當時嗰位阿姨係好嬲,一來呢位親戚平時係好縮骨,有任何家庭聚會例必靠「痴」,唔會出錢,佢地已經唔多鍾意佢;二來呢D喜宴人情,仲要咁縮骨唔想俾,佢點同個女交代。於是,即便呢位阿姨自己住喺澳洲,機票貴過A嬸封人情,佢都搭飛機返黎追,一定要佢俾。初初A嬸唔肯俾,但敵不過阿姨嘅怒火,最終都係開番張票俾咗。

好啦,今次我結婚,我奶奶就特登喺宴會完咗之後,一返到屋企即刻搵佢封人情出嚟,想明天拎去兌,睇吓兌唔兌到,但世事就係咁巧合,喺百多封人情入面就係唔見咗佢嗰封!我奶奶梗係嬲爆,話「又係佢!」但係,奇怪嘅係我表姐係有MARK佢有俾人情,仲寫咗係支票,而我老公都記得係佢親手接。我表姐話佢收到人情,MARK完數,就會即刻放入箱,RECEPTION完後就一整箱交俾老爺,之最後仲CHECK周圍有無跌嘢,所以好肯定無可能係跌咗。

咁,張支票去咗邊呢? 無人知。

我奶奶第二日即打俾A嬸,叫佢停張支票,原本都只係唔想佢俾咗冤枉錢,但佢竟然話:「我嗰張係禮卷喎。」

吓?! 我表姐明明寫咗係CHEQUE…… 當下大家嗰心都係諗同一樣嘢,「呢條友講大話唔想再開票」。

ANYWAY,我講咗件事俾表姐知,佢勁唔安樂,仲即刻打俾HM,問有冇執到,但回覆係冇。我都信如果佢地執到都會俾番我,因為正常支票都劃咗線,兌都兌唔到。

奶奶當然到而家都唔信係「跌咗」,咁多封唔跌,又係「只係」跌佢嗰封。不過,我老爺講得好啱,就算佢真係唔俾都算啦,有佢嘅人情都係錦上添花,呢D嘢追都無用。

但要話佢又講唔通,因為我諗唔到佢有咩辦法可以喺我表姐手上攞得返封人情,我同老公講笑話,可能吊住咗條魚絲。

哈哈哈哈哈哈哈哈哈哈哈哈~~~

順帶講下,之前我咪提過有個親戚串我擺BUFFET 佢會食唔慣,之後俾我嘅神勇老爺串佢,嗰位人兄就係呢位「A嬸」,所以話呢個世界係好多人喜歡找碴子,你擺BUFFET佢串你唔擺酒,你擺酒佢串你無翅食,你俾埋翅佢佢就會問你「我隻飽魚呢?」呢D麻煩友,根本睬佢嗰個就戇居。

呢件人情失竊事件,將成為我婚禮後親戚之間最開心嘅TALKING POINT。

講完呢啲離奇事,下一篇我就開始分享開心嘢啦~~~~

沒有留言:

張貼留言