2013年9月1日 星期日

感動我的芝麻綠豆事

結完婚,第一個感覺係「relief」。

成個人鬆晒,唔使下下睇住個磅做人,唔使理芝麻綠豆事,更加唔使再倒水式駛錢。

上一篇講完我婚禮的騎呢嘢,今篇我一定要寫低所有開心嘢( 盡量啦…… )

其實,我覺得成個婚禮開心事係佔99.99%。


第一件事係我老豆,我成個婚禮最擔心佢,佢係粗人一個,好失魂又騎呢,例如佢朝早喺我敬茶時心胸戴住串大佛珠,佢話係用嚟保祐我,最後當然俾我勒令佢收回啦,又例如喺我致謝詞時,我忍唔住喊,我老豆唔理三七二十一,衝咗上台用一大堆紙巾喺我塊面到幫我「擦」眼淚,好彩佢無擦甩我d假眼睫毛。不過,呢d事騎呢得來卻很窩心,因為我爸爸真的好錫我。


最最最窩心係一班陪我嫁的好姊妹,十級愛佢地。我個婚禮話就話簡單,但其實一d都唔簡單,普通要做嘅嘢唔使講,佢地仲要幫我做埋布置、司儀、招呼人客,仲要做妹仔幫我呢樣嗰樣,個個都十級多嘢做。但佢地全日都只係叫我,「你唔使理架啦,你去化妝啦。」最開心係見到證婚枱嘅布置,比我原先安排的更靚,有一啲細節我直頭都無講過俾佢地聽,佢地又話頭醒尾,自己做晒。因為有呢班姊妹,我婚禮先可以咁順利。


還有,我的一班好老表,我表弟用咗年幾時間去練琴幫我彈進場的結婚進行曲,後尾我先知原來係好鬼難彈;他們還準備了一份神秘禮物給我,就是每人用不同語言寫下恭喜,影下相送給我,中間還有我遠在西班牙的表妹仔呢,那一刻真係超感動~~

還有,我老公一個同事因為有事忙,一早已說來不到婚宴,我們也沒有派帖給他。婚後復工第一日,他卻是立刻走來,送個紅封包給我老公啊! 超有心。

還有,我們的賓客真的好好好好愛我們,婚後第二天我們點人情,真的好滴汗,因為最後他們給我們的總數,cover了婚宴不特止,還竟然足夠我擺多一次,別忘記到最後我只有130多位賓客!!! 

好多好多開心事,成為我美麗回憶,因為有這個婚禮,我更清楚知道我真的好幸福,所有朋友家人同事全部好錫我,搞這個婚禮令我得着好多。

放開一點,結婚真係好開心的呀~~

沒有留言:

張貼留言