2013年9月1日 星期日

大日子之離奇事件簿(上)

我嘅「五四運動」過咗,好開心!!!
當日有好多好好朋友同好同事來,佢地全部都係我生命中好重要的人,因為有佢地,我先會搞一場婚禮。

好啦,開心嘅情節我遲d先同大家分享,今次點都要講咗三件離奇事先。

■第一件事 ── 新郎、攝影師之向左走向右走

話說一朝早,接新娘時間,原本預咗新郎11點半到酒店,攝影師喺樓下接佢,影15分鐘相就上嚟。

到11點幾,攝影師就落咗去接新郎。

跟住……

新郎一上到嚟,我的姊妹就梗係開始起哄啦,大家玩咗2分鐘,我喺房聽到有個姊妹大叫,「攝影師呢?唔見咗嘅?」

我老公仲搞笑,佢個反應係話:「咩嚟?」

我有個阿姨即刻發散人去搵隊crew去咗邊,落到去喺大堂,攝影crew係成隊企咗係到,仲要左右仲有個人守住,當阿姨見到攝影哥哥時,就話:「哥哥仔,新郎兄弟上咗去啦喎!」拫據我阿姨嘅描述,攝影哥哥係好驚訝,用好長嘅聲音講咗個字:「吓~~~~~?!」

完全無人知新郎兄弟們係可以點樣「甩身」,「避過」咗攝影師嘅「追捕」,喺房嘅我當時唔知點解覺得好好笑。之前做姊妹,完全都無發生過咁嘅事。

當然,攝影師佢地梗係捉番新郎兄弟落去影相啦。

老公對呢件事嘅結論同解釋係:佢係占士邦,甩人叻。但我同一眾兄弟們嘅結論卻是:佢太似酒店部長( 因為佢當時無戴襟花 ),所以無人知佢係新郎。

因此,當晚我地長期叫我老公「部長,影相!」

哈哈~~~

■第二件事 ── 外父失魂記

我貴為屋企大女,老豆當然好緊張我嫁人,所有嘢佢都好緊張,大至過大禮、買金,細至封利是、買西裝。

不過,佢平時好失魂,所以我已經安排我個妹全日陪我老豆,等佢定d同埋提佢所有細節同帶嘢。( 都唔知點解佢會咁緊張 )

到證婚時,岑律師講解,我老豆突然面紅、大叫:「我唔記帶身份證!」

Well.........

好彩岑律師話,你們明天補番,但遲過明天,4個人就要重新簽過。

所以,當我老公夜晚得戚地同我講:「結咗婚就有資格包二奶」嘅時候,我氣定神閒同佢講,「基本上,多得你外父,嚴格嚟講我係未嫁你,哈哈。」

而第二日朝早,我隱約聽到我老公喺電話問我個妹搞掂身份證未………

哈哈!!!!


至於第三件事,先係全個婚宴嘅精華所在,係「奇情失竊事件」,不過因為篇幅關係,下回分解。

沒有留言:

張貼留言