2014年10月9日 星期四

這幾天一直緊跟佔領運動的新聞。
心情五味紛陳。
實在沒有心情講飲講食看婚紗。
原本已打算遞上去的辭職信,
因為運動發生,又不爭氣地回到抽屜裏。
只因我希望見證歷史。
在這一刻,我希望能為社會做點什麼,
那怕只是寫一篇稿、編一個版。

祝福我城。
學生們,撐你哋!

2014年9月17日 星期三

飄來榴槤之香

果后呢家嘢,真係好「acquire taste」。

喜歡吃的人真的好似中毒咁,不停咁食。之前聽收音機,有個師奶話佢好鍾意食榴槤。試過有一次買餸,買咗4個金枕頭,之後因為太重,行到攰坐喺公園抖一抖,望住啲榴槤,忍唔住,食啖一口。之後一口又一口,佢竟然……喺公園食晒4大個榴槤!

我屋企一家人都係食榴槤,而家就只有羊生唔食。我嗜甜的關係,最愛就係食榴槤甜品,以前無乜地方有,所以多數幫襯滿記。

直至噚日,我終於發現新大陸。

我屋企附近有一間幾出名的甜品舖甜源居,玻璃屋式設計很可愛。之前一直無機會試,今次試了「榴槤忘返」,真的超好食!!!

圖片來自openrice

之前食滿記,我覺得都ok,只是我不喜歡椰汁,覺得有點怪。這間店的底汁是榴槤汁啊!!!超香甜,當然也超肥,完全滿足我的榴槤癮。而且,配上的紫糯米又係超好吃,很綿又有煙韌,甜度剛剛好,配榴槤汁,真的好吃死了~~

我的最愛
 至於,那件榴槤,有些人愛很熟那種,就是有點點酒香的,我便是這種人。這個榴槤便正合我胃口,真的超甜又不太膩。

愛吃果后的你,不要錯過呀!!

甜源居
西貢海傍街16號地 下

2014年9月2日 星期二

OFF those headS──去黑頭、粉刺必試之B.LIV

護膚品,我其實好少買。

一係唔買,一係會買支人人都話得的,費事成日買、成日試咁煩。

我對護膚品的質地、香味、用法都有preference。

質地方面,最好係gel,唔中意任何cream狀物體,厚身質地的cream有「立」的感覺,而且感覺太rich,唔適合我。

香味方面,最好清新一點,我中意茶樹味或者係herbs,或者無味都ok,最憎好大陣味嗰d,尤其係生果味,「甜爺爺」,免搞。

用法要簡單,又要Steam又要定時定候搽的都要bye bye。

毛孔大同黑頭係我的天敵,所以我有時做完gym都去焗steam、之後再用磨砂洗面,真係好work。不過,呢排太忙,所以無去。朋友N之前介紹咗一枝叫b.liv,專門用來對付黑頭的,質地gel 狀,早晚搽,一個月可見效。佢話佢有個朋友試過好work,叫我試下。

我買了左邊一支,莎莎有售。(網上圖片)
我跟住心思思就買咗枝,大約400幾元。一搽上去我覺得有少少涼,同埋少少難推。Anyway,我都係早晚搽,我發現搽完一個星期之後,啲白頭黑頭浮晒出嚟,好容易可以做peeling清走,之後我正常地拍番爽膚水,我推薦用牛爾老師的爽膚水,超好用又平,好適合混合肌膚,我壓力大時會用佢浸濕面膜紙敷面,可以預防暗瘡。

colour mix有得賣,100元有找。
So Far, 我覺得都ok好用,涼涼地,而且真係無咁油。而我的黑頭真係有顯著改善,我無影低前後對比照,但有blogger有更詳細介紹。有興趣的jm,可以試下。

blogger 的before(左)及after(右)
參考網誌:http://www.theztyle.com/home.php?mod=space&uid=45834&do=blog&id=199452


2014年3月11日 星期二

學車,二萬與三千的分別

今次真係瀨嘢。

我4月2日考車,早於過年前在網上找了個師傅學,至今上了5堂課,終於明白點解駕駛學院收人兩皮嘢都仲咁多人報,只因出面街的師傅太良莠不齊,太多陷阱,我自己就係一個例子。

我過年前1月已經找師傅,打算2個月密密學點都學識。

之不過,我個如意算盤錯晒。

1. 約咗都改你堂
明明一早約好的時間,佢一個電話話要改就改,有一次仲要直接cancel我的堂!! 如果我係遲考就算,但我4月2日考,我連彎都轉唔到,仲要掉走我啲堂。到而家為止我只係上咗5堂,但仲未出過去考試條路,你話死未?

2. 指明要A師傅,變咗B師傅
呢樣嘢真係好過份,學車揀都係揀師傅,我面皮薄,所以師傅一定唔可以惡,於是我就指明要A師傅,我問的時候佢話「頭兩堂都係學基本嘢,阿B師傅會教你,之後就會我教番。」但現實係,我上咗5堂,A師傅只係上咗2堂,其餘都係B師傅教,之後大部份都係B師傅教,B師傅年紀大唔耐煩,未開車就鬧人,痴線!!要求轉人,A師傅又話唔得閒,不負責任。

3. 道路夜晚先准學,但佢無空檔
我唔知原來培正道係要夜晚先可以練車,但我夜晚要番工,咁正常人等都唔可以係咁請假學車,只可以喺放假的時候學。我一早問個師傅,佢又唔同我講,報價時問我想幾點學,咁我咪答佢晏晝。但原來晏晝只係喺九龍塘學,要去試場就係要夜晚。我即刻好驚,仲要我唔搵佢佢唔搵我,我主動搵佢,佢話你密D學啦,但係同佢夾時間佢又無,你話點算。

基本上,而家我係兩頭唔到岸,唔知考好定唔考好。

回帶睇番我老公,佢報駕院,時間易約、學車歷程清晰,先唔好講師傅質素,淨係約時間已經煩少好多嘢,大家有個PLAN,我心中都有個底。但佢就係貴,2皮幾嘢。

之但係,我呢D返工一族,時間束縛大,約時間係好重要,對比而家,我都唔知我點算。

我奉勸各位,可以按自己情況,如果你係時間很自由的人,不妨平啲搵街師傅,但若果你好似我咁,時間有限制,真心勸你唔好博。

我而家打定輸數,學到4月1日睇情況,睇下自己學成點,考唔到,就惟有再嚟過,但發誓一定唔會再跟師傅。


2014年2月25日 星期二

別在沉默中死去

大大話話在傳媒中工作了快9個年頭,不時也有埋怨,人工低工時長要求高……但,最後我還是做到現在,還是要拼下去。無他,這一行就好像糖衣陷阱。做下去是很苦的,金錢回報很少,只是令我覺得我的工作有意義。

最記得初入行,一次要編一個A24的版,內裏有一篇稿說有個內地女孩生活窮困,無錢醫病,急需捐助。只是短短600多字的稿,還要是很後的版面,編後我也沒放上心。第二天,我收到了兩個電話,都是讀者打來的,她們向我說願意捐助50萬給這個女孩。

這一刻,我知道這支筆的影響力有多大,也是我工作下去的原動力。

今天,我們笑大陸人這麼多冤假錯案,上訪的還要給人折磨。沒有了第四權,我們跟大陸是沒有分別的。最後受害的不是新聞工作者,而是你及我。這篇是記協主席的遊行發言全文,一針見血,望各位也能跟我們一起,堅守我們的第四權。

【記協主席岑倚蘭二二三遊行發言全文】

各位新聞界朋友、各位市民:

今日看見這個情景,感到好激動。作為記者,我們希望去採訪集會,多於站在集會台上說話;我們希望去採訪寫報道,而不是寫立場、寫聲明。我們想訪問人,不想被人訪問。但最近新聞界接二連三出事,令我們不得不站在台前。我在新聞界近三十年,未見過這樣差的情況,今年亦是我第一次為業界及行家流淚!

香港的傳媒很蓬勃,單是報紙,平日有三百多萬份出版。但現實是,多元化的聲音,漸漸變成單一。熱鬧景象背後,一場滅聲行動正在進行!

我們看到是:《商台》李慧玲被粗暴解僱、《明報》空降大馬老總、《am730》、《蘋果日報》被抽廣告、特首梁振英向《信報》和練乙錚發律師信、《經濟日報》刪改專欄作家周博賢文章、《成報》篡改劉銳紹專欄、香港電視不獲發牌,《南華早報》由政協出任老總後,將「李旺陽死訊」變成一段百多字的簡訊。在海外,「無國界記者」2014年的報告,香港的新聞自由排名,由 2002年的第18位,12年後,大幅滑落至第61位。去年5月,美國自由之家的報告,我們排第71。本地方面,近日港大的調查,市民對新聞自由的信心,跌至回歸新低。

就只有這些嗎?不。還有一些,是讀者看不見的:

1. 貨櫃碼頭工潮期間,有報紙將記者寫好的整個李卓人訪問刪走,剩下400字的版位,要記者填補;

2. 有攝記拍下和黃高層嚴磊輝和李嘉誠紙板公仔,被工人掟糯米雞,不過,這張相不能刋登;

3. 有報紙抽起一整版關於碼頭工人辛酸的報道;

4. 新鴻基郭氏兄弟和前政務司司長許仕仁涉嫌貪污案,只出許仕仁的相,郭氏的相不會刊登;

5. 訪問學者時,表面中立,但擁護泛民的學者,例如: 馬嶽、蔡子強、杜耀明,一律禁止訪問;

6. 報道自由行時,要以香港經濟為重要支柱,全面報道自由行的重要性及對零售業的好處,經常提示記者一句話──「沒有自由行,誰支薪給你們?」;

7. 有上市公司在招股書上主動披露一單官司,白紙黑字寫出來,記者想報道,怎料編輯否決了,或者是不想開罪這間公司。記者唯有將這個新聞點傳給其他報館記者寫;

這些事,前線記者每天面對,為了這份工作,有人走鋼線;有人沉默;撐不下去,就黯然離職。報館高層,接西環電話、接高官電話、接大公司電話,情況比大家想像更加嚴重。

風起了,風來了,你不知風何處吹來,但你會感受到,打壓媒體的掌權者,不會這麼愚蠢、這麼赤裸,用「有形之手」來殺你!

那天我和李慧玲出席城市論壇後,她說在地鐵被人指罵,我十分痛心。為何做新聞工作,要遇上這種事,為了甚麼?

那一天,我看見明報百多個行家,在公司停車場默然站立,我十分感動,他們是「新聞界的勇者」,甘願冒秋後算帳的風險,為新聞自由站出來!

記者拿的工資不算高,工作時間亦很長。這份工這麼難捱都要做下去,為的是報道真相,遇到不公義的事會發聲。這何這些人,今日要被人欺負、被人侮辱呢?

市民或者覺得,這些是公司商業決定,是勞資糾紛,與我無關!但一連串事件加起來,這個趨勢已經很明顯,有人想收編傳媒,懲罰不聽話的記者。這個冬天,香港傳媒特別寒冷。

各位,如果我們不捍衛新聞自由,「一國兩制」就保不下去!將來新聞可以怎做?可能要效法內地傳媒,打擦邊球!李旺陽枉死,現時香港傳媒可以刊登他「吊屍窗邊」的照片。內地呢?要拍一張考試放榜,學生踮起腳看成績的相,只是影着腳,等讀者聯想!

又或者,劉曉波獲諾貝爾獎,現在可刊登頒獎會場內那張空凳,將來呢?像國內傳媒,只能登一張運動場內空凳的相片。

市民又會覺得,這是新聞界的問題,關我甚麼事?

新聞自由受損,新聞工作者不是最終的受害者,最終的受害者,就是大家!控制新聞的目的,就是控制大家的思想 ── 他想你知道的事,你才能知;他想你支持的事,久而久之,你就會支持。各位,這樣才是最恐怖!

「新聞自由」是「言論自由」的一部份,「言論」就是「思想」的表達方式。「新聞自由」受損,最終會令到「思想自由」亦受限制。沒有了「思想自由」的人,再不是正常的人!

香港的新聞工作不盡完美,我們都有犯錯,但過去在報道和市民息息相關的事件上,我們盡己職,包括六四民運時,留守最後一刻;沙士期間,冒着「中招」的風險,出入醫院、淘大花園、還有踢爆曾蔭權涉嫌收取權貴利益、唐英年梁振英大宅的僭建等等,還有……更多和民生有關,例如無良販商呃斤騙両後「坐地起價」、地產商涉嫌吹噓樓市蓬勃,揭露毒奶粉禍害兒童、踢爆國民教育科的問題,免使你們的下一代要接受『進步、無私』的執政黨一言堂教育。」等等……

現在傳媒被整頓,將來你遇到不平事,誰替你發聲?新聞界──「你可能不喜歡她,但是你需要她!」

今日我們在特首辦外集會,我們要求梁振英維持一個無打壓的空間,讓新聞自由和言論自由再次百花齊放。梁振英先生,請你不要忘記,你參選期間跟記協簽下的「新聞自由約章」,在這裏,我們促請你兌現承諾,以實際的行動捍衛香港的新聞自由!

各位市民,這一場是覺醒的運動,我很想在這裏向全港市民說:「新聞自由受損,與你有關!言論自由受損,與你有關!」如果我們不想香港出現「國王的新衣」,不想下一代「指鹿為馬」,你就要支持這場運動!

今天的集會,只是序幕,我們要集合更大的力量,要等那些打壓傳媒的人後退!我們要守護香港核心價值,撐到最後一刻,請與我們並肩作戰!多謝各位!

香港記者協會主席 岑倚蘭

2014年2月16日 星期日

一千蚊,買一個教訓

原來,租樓可以這樣煩。

住了一年的新婚屋,昨天終於都跟「它」說拜拜,但這個goodbye卻十分不快。

一早,已有朋友說我太好人,竟然交租至最後一日,沒有早兩個月斷米。而我明知這個業主十分計較,所以交還鎖匙之前簡單清潔了一下才給他們。

他們真係出人意表地賤!!

首先,佢間屋本身已很爛,水管穿孔、電熱爐斷線、壞門、天台地板浮起、廁所壞燈等等等,佢所有壞的東西都沒得修理,因為全部都是內地出品,要番大陸買先有,香港無。但佢所有嘢都話唔記得,又話庳我的時候是好地地,說我沒有幫她抺地板,其次話圍欄有雙面膠紙,仲要老屈要我幫佢換電燈膽、洗天台。

痴線!

到最後,因為我不及她癲,而且當時搬完一日屋,我又累又餓,佢最後成功屈咗我一千蚊清潔費。

這個故事教訓我,首先不要以為人人都會講道理,人人是好人,而且千祈唔好信agent嗰句「呢d好小事,自己換都得」。租之前要寫明所有有損耗的東西,也要寫明大家的責任條款。

總之一切都要白紙黑字。

祝我下一手租客好運。

2014年2月11日 星期二

美國直送,Kate Spade 大劈價!!

各位女士,以下係魔鬼廣播。

美國的kate spade 有surprise sale啊~ 最低去到75%off,二五折是也!!!

網址:
http://surprise.katespade.com/on/demandware.store/Sites-KateSale-Site/default/Search-Show?cgid=ks-view-all#cgid=ks-view-all&srule=price-low-to-high&start=0&sz=550

價錢等於香港的三分之一,抵過買MUJI~!(非常師奶mode)

這個袋很不錯耶。
這種tiffany blue很可愛,減價199美元
內裏很實用


除了銀包手袋,一些首飾都大減,可以用來做bridal accessories。
這對耳環,只要19美元,100元港錢有找。
這條頸鍊也不錯,只要99美元。
好了,問題來了,人在香港怎樣買。

我的好友C介紹了這個轉運中介,叫UNOBUY。他們可以做轉運,就是借個地址給你,之後幫你寄回來,郵費以磅計,他們有NY同OR的地址,前者比較平,首磅34元,續重24元,後者首重42元,續重32元。

他們也有代購服務,要收10到 CHARGES。我覺得如果可以ONLINE 買到就不用了。

表格按此

利用轉運的方法很簡單,只要在網上填好FORM,選好地址,他們就會給你會員編號,買東西時跟指示填地址,之後再填一張FORM俾佢地,話俾佢地知你買咗乜就可以了。寄到香港可以選自選或送到家中。

各位JM,殺呀。

2014年2月6日 星期四

煲劇對決── 小米 vs Android機

我係一個煲劇迷。

最愛看美劇,Big Bang Theory、White Collar係必睇,搞笑又刺激。
日劇次之,最愛相棒,亦很愛半澤直樹耶~
韓劇就一時時,上次睇的職場之神,題材唔錯,有社會意義。
至於台劇……我已經過咗「情深深雨濛濛」年代……頂唔順,婆婆媽媽,從來唔睇。

不過,今次唔係要分享劇集,而係要分享硬件。
就係--小米盒子及android盒子。

首先,我們的敗家羊喺groupon買咗個小米盒子第二代。

盛惠599個大洋。
聽聞深水埗買仲平,好似係52x元。
呢個小米盒子有優點缺點,我分享下:
1. 包裝好精美,設計又靚,好得人心。
2. 功能方面,大熱的劇、電影、綜藝節目都有,美劇如castle、modern family、two broke girls etc
3. 可以兼容ipad,在ipad 用air play,便可通過小米盒子,將ppstv 或風行電影內的片射上電視睇
4. 無buffer,很穩定,無斷線問題
5. 可以用5g上網,更快更順

我曾經覺得小米最好的,只係用過android之後,小米便相對有缺點。
1. 電影電視的source不夠多
2. 功能簡單,不能看直播球賽等電視
3. 不能當電腦用
4. 只能小米的app

年宵當天,我見到有一檔賣android機頂盒叫star galaxy,有一年保養,仲平! 4xx元有交易,敗家羊一口氣掃了兩部。




用後感比較:
1. 功能較多,又多app,可以當電腦用
2. 電影source 好多,多新戲同電視。
3. 可看直播球賽同大陸電視,睇世界杯正!
缺點:
1. 連線不穩定,有斷線情況
2. 用到lan 線,但唔知點解我上唔到wifi!!!


當我用的時,還是比較喜歡star galaxy這類的android機頂盒,因為function多,source又豐富。小米賣點就係正版機,穩定性強,source係少啲,但都夠用。

我諗我係時候cut now tv了~~~哈~~

2014年2月5日 星期三

學神

今日第一日學車。

嚇到我。

完全唔知望邊,不分左右,手腳不協調。

真係好驚險。

師傅不停提點,「扭軚啦、回軚啦」,搞到我金星直冒。

嗰一刻,我好後悔點解唔18歲學車,後生唔識死,學嘢都快啲,而家一把年紀,揸住個軚盤震騰騰,有驚無險,上完一課。

一把汗。

我跟師傅學,學完一堂,終於明點解啲人貴一貴都報駕駛學院。

因為真係易考好多,我都想沙田考,但係而家無得變,惟有頂硬上。

各位路過九龍塘的朋友仔,大家睇車呀。

2014年2月3日 星期一

新年﹐快樂搬屋

各位bloggers, 恭喜發財!!

很快,我便要跟這個住了一年的家說再見。

這裡有很多美好回憶,還記得跟羊生一起砌傢俬、抺屋、收電器,第一次在家中天台吃意大利粉,在家中露台看海看日出日落……

只是,生活很現實。

住得村屋,交通耗時早就有心理準備,但每逢節日的交通情況卻令我吃不消。市區人多,再加上自由行,很多市區人一到公眾假期便往郊區擠,西貢是其中一個。

每逢周六日、暑假、中秋、聖誕,到現在新年,我都很頭痛,太多人到來又太少車,不知這個區議員、巴士、小巴搞什麼鬼,永遠是不夠車載人,結果人在野,眼巴巴看着一架又一架企滿人的巴士在我面前駛過,想call 的又沒人應機,誇張到說magic word 「加50」(須知該程的士也只是45元!!!)才有一架的士應機,還要是上面已有客,只是「好心」俾位我坐。

終於,我頂唔順,又再一次搬家。

新家也是在西貢,原因有很多,最大原因是我太愛這一個地方,西貢真的太美太可愛,普遍居民又很好人,大家又愛狗,感覺很relax。

今次找家有經驗,專找近市的但又要有一定距離(對了,不想太多人),總之保障自己返工有車搭就好了。

還有4月考車,今個月開始學,祝我好運!!