京阪神最後一擊之必買手信

今日寫寫下稿，突然醒起：我仲有一篇遊記未寫。

做人要有頭有尾，所以雖然隔了這麼久，但我都係要寫埋佢。

京阪神之旅，我真係無乜買嘢。買得最多的竟然係………貓糧。

無錯。係貓糧。

各位貓奴平時有行開pet shop都應該會見過呢隻日本鰹魚同埋「魷魚絲」。

米大人同細佬的至愛。

我家的「躁米」同肥細佬超級中意食，平時香港一條大裝賣25元，細裝好似係15元，今次去日本的「激安殿堂」見到，佢竟然賣698yen有15條!!!! 平均只係3蚊一條(兌7.5算)!!!

我即刻狂買，掃晒架上的所有貨，因為真係太抵，呢隻魚魚好香又有小小汁，分量不太多，不會食完唔食飯，所以我成日都會買俾佢地食。

下面的「魷魚絲」都係大帝們的至愛。有多種味道，同樣好平，香港買要3x元，呢度廿蚊都唔使!! 我又係狂掃。

各位貓奴，如果會去日本記得買返啲俾主人食啦。

第二樣嘢我必買就係呢樣。

自由軒咖喱名物(左)萬能汁(右)

呢隻咖喱真係好易煮又超好食，佢仲有一隻萬能汁，可以用嚟配炸豬扒又係超正，好過用may姐雞汁。

之後呢，仲有一樣係必買，就係「青汁粉」

這款在日本好多藥房都有得賣，飲一包可以補充一天所需的纖維，日本好紅的呀。香港好似現在都有引入，但我見好似係液體，這個粉狀其實更方便。

等我又講下，我搵到的特別手信。逢去日本，我都必定買杯面做手信，因為比香港好味太多，而且又夠特別。

不過，自從有了阿信屋，好多特式杯面香港都有了，今次找到一款暫時香港還未有：綠咖喱杯面!!

後排杯面。

這種杯面我只買了好幾個，當天斷了貨啊~~

美容方面，基本上我都好少化妝，唔係咩美容達人，不過有好嘢就一定會買。

這款酵素洗面粉現在日本好紅，唔記得有咩效用，總之都係清潔得乾淨啲啦。試咗一盒仔，又真係好ok，好似去埋死皮，皮膚光滑咗好多，推薦!

右邊便是盒裝洗面粉

臨上機前，我仲喺機場大手掃貨，買了好多sofina產品，因為免稅關係，我只用了700元便有6樣嘢，香港同一價錢頂多買到兩樣，抵到爛!

我非常推薦大家買sofina的30度防曬，真的又保濕又不會出油，不會惹暗瘡。我的皮膚好敏感，而且會生暗瘡，但自從用咗呢隻之後，就變好咗，極力推薦。

最後，各樣戰利品來張例牌大合照。

就係咁，我的京阪神之旅已經分享完畢，多謝收看。

香港地，真係乜人都有

現在的人是否不懂分是非黑白?

每一晚放工後，我都會同老公去放狗。

原因一，是拿督要去廁所；二是想牠發洩精力，免得牠屈在家行步路都俾人投訴。

我們多是凌晨三點幾放，條路兩邊都有屋，不少人都係放養狗隻，只要我們一行過，那些狗就會吠。

話說，前一晚放工我如常同老公一齊放狗，行到盡頭見到差人叔叔剛剛去完廁所，佢地見到我地就向我地招手，仲以為佢話我地行馬路中心，點知…

「你知唔知有人投訴你地夜晚放狗?」

「吓?」

「佢地話你地搞到啲狗吠到好嘈。」

「吓? 但我隻狗無吠過喎！」

「係呀，呢啲狗（指住拿督）係唔吠，係周邊嗰啲狗吠」

「………但我地剛剛放工先可以放狗喎」

「我明呀，你地就得個知字啦，啲村民係驚有賊，我都認得你地呢幾晚放狗。如果費事嘈到人，就行第二邊，但如果繼續行都無嘢。」

之前一次放狗，我已經見到有人喺屋用閃光燈照我地相，如此無禮貌嘅行為，我都忍你，但而家你自己唔管好啲狗不特止，仲要投訴我？！

而家有法例唔俾人半夜三點放狗呀？！

仲要係你自己隻狗吠又唔係我隻狗吠！！

嘈係你隻狗又唔係我隻狗！！

真係，啲人係咪以為識投訴就大晒？！

香港地，痴線友真係多的是。

BTW，睇嚟拿督又喺西貢警署出咗名。