今天，減肥開始!!

前幾天，跟朋友們一起吃了生日飯。
多謝咁多位甜心~!

看回相片，我那位大肚的朋友已經回復苗條，而我還是像隻熊人一樣。
好有罪惡感。

羊生看到我們的相說了一句……
羊：「你看上去似bb的媽媽。」
我：「?」
羊生：「你似產後未收身多過你朋友。」
我：!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

但我係除了打佢之外，完全無反駁的餘地。

結婚之後，我足足胖了30磅!!
結婚之後，我足足胖了30磅!!
結婚之後，我足足胖了30磅!!

這件事一開始震撼了我13億的細胞，不過因為嫁了，又沒有什麼誘因，口裏說減肥，但也減得很求其，沒有了婚前的衝勁。

不過，今次我再看自己的相片，真的頂唔順自己了。

真係肥到開始自暴自棄，但我知道呢個係墮落的開始，所以我決定再由營養師的餐單開始加跑步減肥。

From IG @vsunnysunnyv

之前看了一個德國女仔的分享，她是一個curvy bride to be，的起心肝跑步減肥，一開始都是事事不順，很辛苦，天氣又差，很多藉口給自己，甚至她都跑到哭了。不過，她堅持了下來，雖然中間因為受傷曾經一度停了下來，但她康復後立即再跑，定下更遠的目標、做力量訓練，與一班志同道合的人一起跑步，結果她用了20周，減了31磅。

她說，她比從前快樂，而且有成功感，也建立了自信。

這個分享不知為什麼很鼓勵了我，沒有人喜歡做帶氧運動的，因為一開始一定很辛苦，急促的心跳、一身的汗水、又沒有即時的效果，但當你願意堅持下來，就會感受到當中的快樂。而開心的，不只是因為減去的30磅，而是因為你堅持下來。

我以前很討厭跑步，而且心肺功能又差，一跑就嘔，但之前減肥時堅持跑步，卻慢慢愛上了一個人跑步的時間，可以騰空了腦袋，聽着喜歡的歌，想像自己喜歡的事，那是完全屬於自己一個人的時間。

婚後因為忙這忙那沒能堅持下去，昨天始終開始跑了，今天跑了第二天，大髀酸痛，不過心情十分好，開始又上了跑步癮，很享受自己一個人的時間。

今天起，全力跑。
**************************
Day 2 Run 30 Mins (MIIT Training) Lost 200 CAL.

打邊爐、去派對，食極唔肥法

好久沒有講餐單，今次係講打邊爐同去聖誕party嘅減肥方法。
首先講打邊爐先，因為天氣凍，唔打邊爐唔係人，所以我都會去打，上次營養師俾邊爐餐單我跟，大可以參考下。
朝早都要食早餐，可以食兩片麥包、同一片低脂芝士或一杯脫奶。
午餐都係食好少，可以食兩片麥包 / 2/3碗飯 / 1碗通粉，以及無限菜及1個生果。
重頭戲就係打邊爐，大家可以嚴選以下多款食物其中6樣：
2片牛 / 雞 / 羊 / 豬 /  豬潤
3隻蝦 / 3隻帶子
2件鮮魚片
3件蠔 / 魷魚 / 象拔蚌
1件豆腐
5粒牛丸 / 白魚蛋

以及以下3樣
1/4 碗烏冬
1/3 碗米粉 / 粉絲
1/3 碗米線
1/2 條粟米
14 扎芋絲

無限菜。

記得打邊爐時要用清湯底啊!! 這餐單是將全日的蛋白質攝取量放喺晚餐到，所以早午都要唔食肉，只係食五穀。

到聖誕派對，有係身不由己要去，所以大家食時都要注意一下，多食冷盤前菜，少食熱盤。
所有烤、燒、焗的都可以食，只要走汁就ok了。
大家要記住進食次序：清水 --> 蔬菜 --> 五穀 --> 冷盤 --> 熱盤 --> 水果

呵呵，我都有多個派對要去，又有自助餐要食，希望可以保持而家的體重啦~

減肥飲食技巧初體驗

我嘅減肥之路已經行咗一大半，療程亦只剩一個月都無，到而家為止，我由126磅，減到到115磅，2個月減咗11磅。

相比起我自己未參加之前亂咁減，已經係好好多，而且落磅落得好穩定，有時我都會偷食，好似我會食吓幾粒糖(尤其係姨媽到時，我仲更加嗜甜)，除咗中間有一兩個星期好反覆唔落磅之外，其餘時間都一直減，平均速度係3日減0.6磅。

營養師教咗我好多飲食技巧，呢啲技巧未必可以減到，但跟着做的話可以幫助保持體重，等我分享吓先。

首先係食嘢，我一直都覺得減肥要戒澱粉質係好困難，因為會成日都好似好肚餓咁，但原來只要啱份量係無問題，而薯仔又比白飯好，無咁高糖份，所以焗薯係可以食，只要不落牛油就可以了，另外減肥期要食包的話，嘉頓會係你嘅好朋友，因為我發現營養師提議食嘅都係嘉頓，好似english muffin、飛邊麥包、pita bread等，都係減肥之選。還有，芋絲都係減肥女人的好朋友，低卡又飽肚。

之後就到肉類，其實只要唔食肥膏，同啱份量，就咩肉都ok。我自己就梗係會prefer火雞肉，貪佢低脂，其次就係蝦。

生果反而要注意一下，因為原來唔小心食錯咗都好大鑊，最穩陣梗係食奇異困、蘋果同橙，蕉可以通便，但減肥其間一日只可以食一隻，牛油果、榴槤就要避啦。

至於蔬菜，所有深綠色嘅植物都可以多吃，菇類都可以，但係一到有根莖嘅(蘿蔔)或係果實類(蕃茄、南瓜)就要小心啦，多食會肥的。

出街食飯，就點食都肥，可免則免。不過免不過的話，就盡量揀輕嘢食。唔講唔知，原來營養師係唔建議食apple green的，因為用的source太heavy，佢竟然寧願我食切雞飯!!!! 

最後一點，其實減肥不宜食得太少，會減慢新陳代謝，反而減得仲慢。我就係一例，初時營養師就俾個正常小小嘅餐單我跟，一直減得好快，相安無事。之後一個月佢無啦啦俾d勁低卡餐單我，我無輕到不特止，仲要重咗少少又反覆。佢初初仲以為係因為我偷食，但後尾食番正常小小的餐單之後，我又好快落磅，結論就係太低卡令我新陳代謝減慢，反而減得仲慢咗。成個減肥過程，我覺得最重要都係做運動，如果只係跟餐單，我諗我唔會減到咁多，我有時會偷食，但做運動就絕對無偷懶，每次都做60分鐘帶氧運動，一星期至少3次，通常4次，所以落磅先會咁快。

希望以上嘅小小心得，幫到各位減肥中的女孩子啦! :)

激進蛋白餐

一排無記到個進展，其實都無乜大進展。因為到咗疑似平台期，我由126磅減到而家118磅附近，今日117.8磅，用股巿術語講就係「徘徊待變」。
之前，營養師俾咗個「好啃」嘅餐單俾我，就係蛋白餐，每餐食好少，加上我姨媽到，結果血壓偏低，所以即刻食番正常，寧願做多d運動，而仲好一點。
蛋白餐其實就係三餐食兩隻蛋白，唔食肉，早餐就有兩片麥包、午餐都有三份穀，但晚餐除咗菜之外就乜都無。
真係好低攝取量，我就跟咗一日之後頂唔順，頭暈。

之後，我仲有三文治餐啦、高纖餐、茄汁豆餐、壽司餐，好多花款。其實全部都有唔同作用，有d係去水腫、有d去便、有d係低脂。所以我覺得俾錢跟佢，就係貴喺呢度，有人調節餐單。

今日見營養師，俾佢知道咗我有時一日只係食咗兩餐，有一餐無食到，我以為食少d會減得再快d，但原來係唔得，食得太少令新陳代謝慢咗，得不償失，所以佢千叮萬囑我一定要食三餐。我還有意外收獲，上次營養師叫我買維他命丸食，我係完全無咗件事，佢今日送咗一大樽俾我!!!!!

每日食一粒，我真係從未試過咁健康，多謝晒~~~~

運動減肥要識計數先work

自9月25日跟隨米記減肥開始，直到現在上次10月24日磅重，我減掉了6.5磅，就是我家大肥貓阿米一半的體重，哈哈哈哈 (認真想想，阿米大帝都要認真減吓肥了…)。營養師說，我的case進度非常好，雖然仲有11磅要減，而第二個月先係真正的挑戰開始，因為惰性開始發作，而三分鐘熱度開始減退，為了提醒自己要努力，我在iphone set了一張試婚紗時的虎背熊腰相做wallpaper，時刻提醒自己，不可再變回那個自己，要將頑固脂肪減掉。

今日見了運動教練，學識了怎樣做運動同點計消脂。有做開運動的人一定有聽過，好多人都話「做運動要做X分鐘後先開始消脂」，而中間的X，有啲人話15、有啲人話20，有啲人話30，仲有啲人話係45!! 我一直都好唔明……直至今日，我明了。

所有人講的X不同的原因，是因為中間夾雜了兩個不確定因素，就是心跳率及年齡。

原來每個年齡組別都有一個「消脂」心跳率，計算程式是：(220 - 年齡) X 60%至80%=你的消脂心跳率

只要到這個心跳速度，開頭20分鐘，身體會先消耗肝糖，之後便消耗脂肪，所以該20分鐘不是一開始就計的。但要做多久運動才到自己的消脂心跳呢? 就人人不同了。有些心肺功能好的人，可能要做好久才能到達該心跳速度，又有些人整天說自己做運動都減唔到，都是因為他們沒有量自己的心跳吧。而我今日做完心肺功能TEST，結果係「差到OUT RANGE」，教練都窒一窒，若然有分GRADE，我嘅心肺功能一定係U。不過阿Q精神嘅我，會諗我只要跑一分鐘就可以開始消脂啦，HAHAHAAHA。

由於我心肺功能太差，教練就建議我做運動以自己舒服為主，礕如跑步，可以跑慢D，但跑耐D，這樣反而消脂得更多。

今日的半個鐘，我真係獲益良多呀。

去水腫的薯仔減肥餐單

星期三睇咗黃子華的洗燥，狂抽政治水，不過都幾好笑。

睇完之後都11點幾，去咗食韓國嘢，我原本真係只打算食個冷面，
但係去到我的最愛的錦城，我投降。
兩條友食咗一個海鮮湯煲同一碟紫菜飯。
第二日見營養師，唔使問，重咗。
因為韓國嘢樣樣都有泡菜好鹹，所以變咗水腫。
跟住我就要食一個減肥去水腫的餐──薯仔餐。

早 1杯脫脂乳酪+2片小麥包
午 一個拳頭大(約180g)的薯仔+2份肉(8片瘦肉)+無限菜(有葉類及菇類)+1個生果
晚 一個拳頭大(約180g)的薯仔+1份肉(4片瘦肉)+無限菜(有葉類及菇類)+1個生果
一樣只可食兩日，唔可以連續食，效用係去水腫同消脂。
仲有一樣要注意，乳酪市面上有好多牌子，但係唔係隻隻啱，要食yoplait 牌 fat free嗰隻。

食大餐前夕的粟米餐單

我由9月24日參加米記開始(我真係連自己邊日「被求婚」都唔記得，但記得幾時join米記 =p)，一直跟營養師的餐單同做運動。
到而家已15日，共減咗3磅。期間有唔同嘅餐單跟，但一直都無挨過肚餓，仲要食得好飽。
噚日見面，我又有新餐單，就係粟米餐單。

早 2片小麥包+1杯脫脂奶
午 一罐粟米+4湯匙吞拿魚+無限菜+一個青蘋果/奇異果
晚 一罐粟米+1隻蛋+1份肉+無限菜+一個生果(小橙or 小柑)
份量係比較少，因為自從跟了餐單之後，我的胃口細咗，而且食唔到4餐咁多。
呢個餐單我跟得好舒服，主要因為我中意食粟米(又係因為甜甜地)。
這個餐單可以係食大餐之前嗰日食，咁就唔驚「大餐」會over咗太多，但唔可以連續兩日食。
要注意嘅係，粟米唔好買地捫，因為好高納，要買巨人牌。
一大罐先80個卡路里，熱量仲低過食一碗飯。

減肥者，必食巨人牌。

米記減肥之餐單分享

剛剛過去的一星期好忙，不停去應酬同飲宴。
噚日見營養師，好彩都瘦咗1磅多d。
講開飲宴，營養師都係嘆一口氣，話：「都無乜嘢係唔肥，盡量就啦。」
佢建議我朝早都一定要食嘢，食兩片小麥包(即係嘉頓飛邊嗰隻)，下午做姊妹多數去飲茶，可以食兩件燒賣加件蝦餃，再加個叉燒包。但我唔係，我懶醒食咗個拉面雜菜沙律，以為唔肥，點知俾人話。原來拉面係不論點煮都唔可以食，因為麵出面有層油，又係點煮都唔會甩。

最重要的便是晚宴。
本身營養師係叫我食3片乳豬(去皮去肥)、3隻帶子、3隻灼蝦、一片鮑片、兩件雞、2匙魚，加一碗飯/湯面。全部要走汁，同埋唔可以食菜，原因係菜吸了好多油，洗都洗唔甩。
現實係，我都係跟唔到。
首先全世界都係咁夾菜俾我，唔通我要逐個人解釋咩，人地一番好意，我惟有食少少，同埋邊會有人喺婚宴到叫飯食?! 至我唔會啦，但呢個「雀量」嘅餐單係唔會食得飽，於是回到家我便食了面包頂肚。之後嗰日係中秋做節，又係食嘢日，難得同阿姨食反，我都盡量食少，但都跟唔到平日的餐單了。

所以，呢個禮拜減得到，功勞一定係跑步機同鄭多燕。

上次食完個薯仔餐後，營養師知我中意食甜食，而且佢想speed up我嘅減肥進度，所以開了一個乳酪餐俾我食。
早 1杯脫脂乳酪+一碗粟米片+一個奇異果
午 2片小麥飽+4片煙肉+無限菜
茶 1片麥飽+一個奇異果
晚 1碗粟米+4湯匙吞拿魚+無限菜
呢個餐單可一星期食兩次，但唔可以連續食，同埋中間有少少adjust過俾我，但好明顯真係令我變左做隻「牛」，狂食菜。
希望下星期可以減得更好啦。

米記減肥之第一次見營養師

為了令自己有恒心，我想把每見營養時的得著記喺個blog到，同大家分享吓一直以來我的減肥謬誤。 =)

我的生活是日夜顛倒，是徹頭徹尾的live like a vampire~起身後第一餐已經差唔多係人地食lunch / tea嘅時間(depend on 有冇 pc or assignment要去)，第二餐係dinner，好多時忍到口就唔食第三餐(即係宵夜)，但係好多時都係忍唔到。

所有人都同我講咁夜食嘢唔好，身陳代謝慢呀、消化唔到etc，總之係致肥元兇，我直至噚日都係咁諗。
今日營養師竟然叫我食宵夜!!!!!

我都以為自己聽錯，因為呢幾日我為咗跟個餐單，我更改了自己的生活習慣，嘗試同陽光多d玩游戲，但營養師見到我mark俾佢個時間後皺眉，佢話我由8:00起身，到3:00先有得瞓係好長嘅時間，得5個鐘唔夠瞓，令到我水腫同失調，咁仲麻煩，而呢樣嘢亦今日磅重之中展現出嚟，我依足餐單(係偷食咗一個叮噹餅, 但營養師都有讚我跟得幾好㗎!)，但體重不跌反升，脂肪比率卻下跌，證明是水腫了。

佢叫我把原本的早餐當宵夜食，減去肉類，只要蛋白質同穀類，起身第一餐食午餐。可以食宵夜是因為只要不是臨睡前3小時內吃，這是沒有問題的。呵呵~~ 我就不用咁辛苦了。

至於水腫，佢開了個薯仔餐單俾我，原來薯仔可以去水腫㗎!!! 我係食chat potato，代飯吃，可以去水腫。

今日，我仲學咗飲宴中點樣食先唔會咁肥，下次同大家分享吓。

參加米施洛，不成功便成仁

上星期五，做咗平生從來未試過嘅嘢。
─── 俾錢人幫我減肥。

一直以來，我不是無做運動，只是我實在太嚵嘴，不停咁食呀食。
而且還要「唔識食」，完全唔知咩係正常飲食份量同習慣，所以跑到腳跛都係減得好慢。

之前我已經想join 米施洛，但係無勇氣，又唔知佢係點幫我(我嗰時係好衰咁諗，d營養師係吹水)，於是一直都無行動。
但係，近排我有幾個朋友join咗都好掂，真係減得好，而且結完婚一年都無反彈，加上有blog友 dap 的介紹同鼓勵，於是我決定踏出人生第一步。

上星期五，我上咗去做體重分析，唔計由自可，一計先知自己嘅脂肪超晒標!!! 
係31.8%呀!!! 足足高出同年齡女仔11.8%!!! 營養師要我減17磅，佢話，其中15磅係脂肪，必須要減咗佢。

佢嘅做法其實係好簡單，都係好似你喺電視睇到d衛生署廣告咁，三低飲食、健康生活。但係諗深一層，三低點樣實行喺自己生活入面，係一門學問。

我今日先上一堂飲食指導，教我點樣計量，令我恍然大悟。我最中意係佢教你點樣靈活配撘飲食，而唔係死死的給你一個餐單去跟，基本上一個餐單點會適合所有人的體質? 所以我覺得佢個評估同跟進就係最好的地方，營養師會跟你的進度調節餐單攝取量。其實佢所謂的餐單都很簡單，只係說你邊一餐要攝取幾多份穀物蔬菜肉類等等，係教你點食，而非唔俾你食，我最中意就係咁了。

好在佢一個月都唔貴，只係千多元，仲包了餸菜，務求你不會食錯，必定減到，每周見兩次營養師。淨係咁都扺了。
佢話只要我乖，3個月必定減到。不過掉轉頭講，如果減唔到，我相信我唔會再提減肥兩個字，以後都唔減。

今天我希望做回少女時代的自己，hahahahaahahahaaa~~
今天的我160cm, 12x磅。明天會變漂亮點嗎?