Back from Honeymoon~~ CHILL~

剛剛由大阪返家，魂魄還未回來呢~

民以食為天，今次旅行真的是很瘋狂，不停地食食食食……每天吃5餐，肥了不知多少斤回來，沒膽上磅了。

回程已想定了今次一系列的關東遊blog，包括：

■ 交通資料、買票心得

■ 酒店、旅館點評

■ 羊生羊太 top 3必食拉面

■ 羊生羊太 top 3 必食餐廳

■ 羊生羊太推介必吃地道小食

■ 羊生羊太 top 3 難食食肆 (由旅遊書推介)

■ 羊生羊太推介必行景點

■ 羊生羊太推介必買手信

■ 蜜月旅小總結

暫時想到就是這些，明天開始執筆，大家等我啊~~

京都八坂神社

4個女人Fine Dinning @ Madam Sixty Ate

昨天，四個女人又來一個墟。

上次吃完齋，今次決定來個fine dinning，給兩位美女提早賀生日。

目的地就是Ms. N推介的灣仔Madam Sixty Ate。

這間餐廳一入去就見到隻「豬」。

環境好cozy，裝修得很細緻又有class，仲好chic……

好大隻野豬 XD

我們先order了一杯drink，佢地個個飲紅白，我呢？喜歡驚喜，所以好中意飲cocktail。

就來一杯 Madam Affliction吧，Suprise me pls!

就是這杯了。有absolute volka同passion fruit，好香；同時，好酸。

 我們每人都點了一個3 courses meal。

順帶一提，佢個menu十分十分令人迷惑，太多字，又太細粒……

先來homemade bread，味道一般，蒜泥醬好吃，又香又滑。

麵包比較厚實，不過都很濃很香的穀物味。

 我的頭盤是魷魚沙律，很認真的說，不好吃。

很不喜歡他的醬，太多香料，像吃了「香必飄」入口。

Ms. A的三文魚頭盤配松籽，好吃多了。 

味道好多層次，濃淡適中。

我點的主菜是鴨胸，被Ms. A說我結完婚就「叫鴨」(哇哈哈哈)。

這道菜其實好難失手，Chief煮得剛剛好，肉嫩味濃，

配菜有Black Pudding及甜甜的Coffee Soil，好特別的重口味啊！

奇差的攝影技術，只能看到這些……

隔離位的鱸魚，Tender and Juicy，Cream Source makes the fish SHINE!

Ms. C 的Beef Cheek，她要Medium Rare，煮得剛剛好，肉汁多。

 最後，Dessert Time!!

 我點了Summer Strawberry，他說這是Destructed Strawberry Cake，

有Mousse，有coconut ice，也有jelly。

我要了Summer Strawberry，口感層次多，配了Sprinkle Wine，不太甜也不膩。

這是兩位birthday girls' destructed  black forest cake，好濃好滑的朱古力啊～ 

食飯當天，還見到有人做bridal shower dinner呢～～

Madam Sixty Ate

灣仔莊士敦道60號1樓8號舖

2527 2558

拿督夏水禮

近排成日落雨，天台除了漏水都唔知仲有乜用。

拿督好可憐，成日都無得出街。

講開拿督，早排羊生終於攞咗車可以帶佢去游水。

我們是去元朗水尾村的寵物樂園，那裡地方大又有圍了欄的大草地﹐可以放心讓狗狗狂奔，隔鄰便是我們trainer daniel的狗舍。

拿督係第一次游水，佢係唔識游。我地以為一開始係要tranier教，去到問trainer：「係咪要教佢游?」

點知……

「你同佢着救生衣，然後掉佢落水佢會游。」

…………

哦。

我同羊生就跟住做，又拉又扯，終於掉咗拿督落水，佢好努力咁用四隻腳仔喺池邊游。

游吓游吓……游咗35分鐘之後，佢心知無得上水，就抓住池邊，死人都唔放手。

「好攰呀，抖抖先。」

「大家好，我係靚仔拿督。」落水都不忘單眼電下你。

唔好講笑，真係好攰。

拖佢喺池邊游咗一排之後，佢開始識游，可以自己周圍游來游去，中間仲有隻哥基係咁跟住佢，可惜因為人地係仔，拿督當然唔show人。

其實，拿督同類的大狗仔最好都係以游水做主力運動，一來可以大量消耗佢地嘅體力，等佢地唔會喺屋企搞破壞；二來，最重要的還是可以鍛鍊他後腿肌肉，這類大型犬種都會有髖關節問題，游水可以為他們紓緩痛楚，還可以令後肢練得更有力。

下星期，拿督，我地再去游水啦~~~~~

搬家完成了，可以由新開始。

終於，搬完。

幸好，我寫得不多，也不是篇篇值得回味，204篇裏精選了90篇，其餘的我決定「就讓他一切隨風」，Let it go~~

好開心可以繼續寫繼續發癲繼續瘋狂。

以後yahoo與這裡會同步update，直至yahoo執笠時。

+++++++++++++++++

重有一點，有一位blogger超有心，成立了一個blogger facebook group，讓各散東西的都能有個地方聚聚首。

有興趣的，請聯絡miss little white dress。

忙碌的8月

潛了水一陣，唔好意思啊~

好多好多好多東西要做。

關於考車……

今日終於考咗筆試。

當然，係pass~~

不過，因為我唔係報駕駛x院、x健、x鏘等等嘅學校，係自己排隊報考，之後自己搵師傅學，所以我考嘅區係無得揀，要佢roll。我初初勁驚佢會碌我去天光道，好彩最尾係培正。不過要朝早9點幾考，魂魄都未返，好大機會月巴……

而家要開始搵師傅，學我最差、最弱嘅「機械課程」。

關於夢之店……

籌備工作還在進行，最早訂造的一組婚紗開始陸續造好了，急不及待即看成品，我同表姐都超中意!! 等這麼久、做了這麼多revision都是值得的（有一件啊，要逐條抓紋跟師傅討論同執，回想也恐怖）。現在三個師傅給我的成品只有9件，還有第二、三、四、五組的衫待返，但一想起又要逐件做revision，就……即刻飲罐葡萄適先。哈哈!!!

原本很想在這裡貼出來跟大家分享我的婚紗，不過，由於我攝影技術奇差，所以都係放棄了，留待影好專業相片後才出街吧。

不過，我真的好感恩，有好的老公支持又有好的表姐大人容許我任性，還有一路上遇到很多貴人、同行的幫助，真的真的要好好珍惜。

最興奮的事，莫過於就在夢之店還在成形之中，我們已有第一個新娘子客人來試衫!! 這是我自己也估不到，因為我連衫都係得幾件，這位新娘子很喜歡簡潔、復古但又要時尚一點的設計，而又好好彩她喜歡的類型，我們手上剛剛回來、僅有的9件便有她心儀的款式，於是她便即刻約上來試穿，好開心佢好中意啊~ 可惜我的晚裝還在製作中，她要想想考慮。其實現在最開心不是做不做成一張單(現在其實都無可能啦，舖都未開!)，但有人欣賞自己的婚紗、喜歡到非穿不可時，我自己是很有成功感的。

我也曾是新娘子(講到好似好滄桑，哈)，很清楚要俾錢落單，中間有很多計算，不止是喜歡與否，還有價錢、服務，甚至店舖地點都會考慮。但，只要有人欣賞，即使最後因為種種原因沒下單，但只要對我說一句「好喜歡」，我都會好開心、覺得很值得。

不久，便要開始籌備product photo，還有commercial Ad的相片，現在要努力找心水模特了，我自已最中意蒼井優這類型的女孩子了（不是蒼井空啊！！），希望俾我搵到「佢」啦。

努力~~奮鬥~~~

無聊貼文，《千萬不要在老麥嗌「九件麥樂雞餐」》

面書睇到。

作為C9嘅我，完全無諗過。
下次食麥記都要精打細算一下。

*********************
《千萬不要在老麥嗌「九件麥樂雞餐」》


是咁的...
有無試過同事放Tea，買咗一個「九件麥樂雞餐」。
有無試過排喺前面嘅婆婆同個收銀講：「一個『九件麥樂雞餐』。」
有無試過，你嗌「麥樂雞餐」，收銀問返你「六件定九件」？

呢篇文，將會係前所未有咁深奧。
呢篇文將會探索到係我個人太「計到盡」？定老麥太懶？抑或大家已經接受咗呢種定價上嘅荒謬。

我記得當日，個同事買完個「九件麥樂雞餐」返黎，個個都「狗衝」咁去食薯條，得我一個好似梁朝偉咁嘅樣。梁朝偉係咩樣？
抑鬱囉。

點解呀？
因為「六件麥樂雞餐」係21蚊，「九件麥樂雞餐」係32蚊再加3毫。
而「六件麥樂雞餐」同「九件麥樂雞餐」最大嘅分別就係「三件麥樂雞」。

即係我為咗「三件麥樂雞」比多咗11蚊...
嗯..咁「六件麥樂雞」單售又幾錢？係$15.5。平均一舊麥樂雞唔超過3蚊...

認真我唔明...我唔明咗好耐..我最唔明嘅係身邊無咩人有呢個concern。
可能11蚊的確唔足以打動佢地。
但就足以令我想打X個位同事，因為我有份夾錢...

而面對排喺前面嘅婆婆，睇住佢嗌『九件麥樂雞餐』嘅一刻，我不動聲色。事後我直情有罪疚感。
就好似睇住佢比「猜猜我是誰」電話欺詐，而我視若無睹一樣。

婆婆如果知道我上面嘅推論，佢正路係唔會叫『九件麥樂雞餐』的。佢會寧願叫
「六件麥樂雞餐」加一個「9蚊包」。

最後，當收銀會問我「六件定九件」嘅時候，我簡直覺得佢係挑戰梗我嘅底線，佢心裡面一定係好期待我答「九件」，之後心中恥笑我。再將呢件事作茶餘飯後嘅「吹水題材」。

你可能會覺得「六件麥樂雞餐」同「九件麥樂雞餐」呢個Case唔夠Support。
OK Fine！我講埋「豬柳蛋漢堡餐」事件。嘩！呢個仲經典。個餐就$29.5..而個包就單售9蚊...

豬柳蛋漢堡，人稱「豬柳強」，由佢單售9蚊個日起，我就無再嗌過「豬柳強嘅餐」。記得有一次好友阿強同我一齊食麥記。

佢霸位，咁就我去買嘢食啦，好Fair。我問佢食咩，佢話「豬柳強嘅餐」呀。
我聽完，面色一沉，無應佢就走咗去收銀到嗌餐。

喺排隊嘅時候，我諗起阿強仲話呢排手緊，所以先要食麥記。個一刻，我終於明白點解佢會手緊...

買完餐後我好平靜咁返埋位，同阿強講：「我買咗魚柳包餐（21蚊）加一個豬柳強(9蚊)。」

阿強扯曬火：「喂！我要豬柳強餐呀！」
我示意叫佢冷靜，之後將「魚柳包餐」入面嘅魚柳包拎走，放返個豬柳強落去。

阿強睇到我成個大魔術師咁，不禁拍手叫好！因為一個「豬柳強餐」已經出現係阿強面前。而我自己就食個魚柳包算數。

事後阿強問個餐幾錢，我話：「豬柳強餐廿九個半」佢就比咗$29.5我..
個一餐我只付出咗5毫子，做咗5毛...

可能有人話啲「特價」係有呢種現象，咁我覺得你咪連「九件餐」都一樣有Special offer囉..又可能取消「豬柳強餐」。

篇文其實就唔係要責怪任何事，我覺得21蚊餐同9蚊包都係好嘢黎嘅！
我只係執著一間咁大嘅公司之中，定價上係咪唔應該有咁大嘅邏輯問題呢？


試想想...
夜深人靜，係一間24hr老麥之中，如果我好chok咁order「豬柳強餐」($29.5)加一個魚柳包單售($15.4)，個收銀妹妹會收我$44.9，抑或會教我一個total $30蚊嘅買法？

件事好複雜，難過揀大學。我都唔知..你地點睇？

********
不過又咁講，如果兩個人都係要食餐，咪一樣係咁貴。

拿督回朝──真的變乖了

沒update一排，因為這星期拿督回歸了，我又忙着照顧他。

拿督在學習「stay」的指令訓練

另一隻「陪訓」狼狗女lucy(右)，在教拿督社交技巧。

玩完之後，少爺督死抱水兜唔放。

經過一輪密集訓練，拿督的脾氣收斂了很多，不會再亂跑、撲人、撲車、撲狗﹐在家也乖了很多。

當然做了公公也是原因之一，但我做了狗主5個月之後，對狗隻訓練的體會很深。

有人認為，狗兒回來後就會自己聽話，自己會乖，但實情是不論大小狗都需要主人耐心的訓練，尤其係8個月至1歲半大的狗，是他們成長最關鍵的事刻。禮貎、秩序、服從都是這時間建立的。之前，我什麼都不懂，假手於人，於是撞大板，使多了錢不重要，重要是拿督變得傻了一樣，出現很多行為問題，這才是令我壓力大的原因。

找人訓練也是一門學問，當初我也是愛狗心切，不喜歡別人用惡的方法教他，但撞板之後，我便知當初的想法有多天真多傻。狗是動物，不可以用人的思維去評估他，尤其是大狗，他們真的好聰明，懂得觀言辨色，會不停測試主戈，為自己「攞着數」，例子一：一次，我叫拿督ＳＩＴ，佢唔聽，我由佢無罰佢，之後我叫佢再ＳＩＴ或ＤＯＷＮ，佢都無再理我，因為佢知佢可以唔理我而沒有後果。

所以話，訓練真的要「狠」，懲罰也是少不免，不是要打他，而是要跟他保持距離（例如不可跟他說「bb話」)，要下馬威，要絕對服從。
遲一點，Trainer Daniel便會上門教，為了不讓拿督的陋習死灰復燃，我還有漫漫長路要學。

教狗同教仔，真的一樣難。

我家拿督上學去

9 月才有時間去honeymoon，因為多嘢做多新聞跟多稿寫，但「深層次原因」係因為佢：

拿督大人( Solar )

拿督大人是我們羊家的第一隻狗，來了我家幾個月後，他進入青春期開始變頑皮。

之前請了mack leung 做 trainer，可惜成效不彰。

他的一套排戲、奬勵法，只適合用於中小型狗，這類型大狗，尤其是guard dog，個性太強，mack leung那套方法可以幫牠建立好習慣，但不太能有效糾正壞習慣。而且，有一點令我很不滿的就是，他根本沒接觸過我隻狗，只係印notes俾我。

最後，我們無辦法之下，惟有再請人做training。

今次，我做了research，很小心的選擇，今次的trainer一定要很熟悉狼狗，而且要很有經驗，必須要包教好。這次在網上找了daniel tang，他有狗場在元朗，專門訓練狼犬，而且package的配搭很自由，又不會同我計較，所以便找他解決拿督的行為問題。

他評估過，說拿督要在他處住2個星期，期間我要同佢一齊做訓練。之後再上門做training。

為了陪拿督訓練，我連honeymoon也不去了。

拿督現在還在狗場接受訓練，他要學的東西多着呢，要學禮儀、學社交、學信任人、學服從。

拿督，希望你聽話啦。唉~~

我的世界顛覆了!!!!!!!!!!!!!!

看這篇之前，請大家有心理準備，這裏說的事都很不堪，倘若大家看着這篇時口中正在吃東西，我建議大家吃完先好回來看。

********************
養咗隻狗之後，我成個生活都唔同哂!!!!

我以前係自由人，想去邊就去邊，放工返屋企唔係睇電視就煲劇，還會有時間學日文、寫下blog、煮飯食、做運動……

而家呢?

我一放工，路途遙遠回到家已經凌晨3點，一入屋就要做「執事」(執屎)，還要帶狗去散步，回來沖個涼已經累得不能動，早上又要10點起牀(我畢業後工作以來，除了清明重陽，從來未試過10點起身!!!)，又要餵狗，帶散步，下午3點重覆動作。之後，又趕頭趕命返工。

這，還不算是最累人。

最累人是跟狗狗做訓練，這隻「小狗」(雖然很大隻，但只不過是5個月大的puppy)是大鄉里出省，乜都唔識，唔識上落樓梯、怕車、怕貓，出街上廁所也不曉。於是，我用了我平生最多的精力，跟他一起做訓練。我一直養貓，不太熟識狗，但也知道狗狗需要的關注比貓大得多。養下來體會更深，最深刻的是教上落樓梯，我住天台，他不懂上落我便很大鑊! 第一天，他連行近樓梯也不敢；第二天，如是；第三天，如是……5天過去了仍是這樣，我很擔心。

他就是這樣，幽幽的伏在樓梯口，不懂上落。

 打電話回去狗舍找幫手，得到的回應還是叫你俾一大块錢他幫你教。幸好我的鄰居很好人，一直鼓勵我，說每隻也會懂的。後來我的起心肝﹐帶他出去市中心的樓梯（當然全程是抱的），讓他看看別的狗如何上落，之後我跟羊生幫助他一步一步的，就好像教細路行路般，他．終．於．學．懂了！！　那一刻，真的開心得想哭。現在他已經可以在樓梯自行跑上跑落，飛奔! 我現在反而有點懷念他不懂上落的日子……


行完樓梯之後，便是大小便的訓練，這個真的好攞命。

我等他屙屎，他等我回家……互鬥耐力中

回到家，即瞓!

由於我什麼也不懂，問專業人士得到的回答案是：多點帶他出去等他屙，於是我每天帶他出去4次，一等就是1小時，我還試過等他2小時，我每天的生活目標就是等他屙屎( T_T )，但他仍然無動於衷。他還是拼命忍，回到家即去。那一天，我在效野公園等了他2個小時，他還是不去，跳跳紥，就在我意志最薄弱、最心灰意冷、打算忍佢喺屋企屙的時候，佢終於屙了!!!!!!!!!!!!!!!!
嗰一刻，我開心到即刻大讚佢good boy，我好激動……我覺得那是天下間最好的一督尿(你說我是不是痴了線………)

於是之後，靠着意志同毅力，我每天都帶他出去行吓，狗狗開始肯在外面去廁所，正當我以為問題已經過去時，新問題又來(對，是沒完沒了的)。

他好像很喜歡撲人、咬嘢、唔聽話……這是一隻50磅的狗，這只是PUPPY的大小，不敢想像他長到100磅時撲過來，我會變肉餅定杮餅。

所以，他必須進行家居訓練!!!

在茫茫人海中，我找到了一個很好的訓練導師── MACK LEUNG。

之前，我的狗在回家前也有做過寄宿訓練，成效不是沒有，只是一鬆開釘鍊，他便冋脫疆野馬，但我不想我的狗這樣。我希望他是因為喜歡跟着我而跟着我，而不是因為怕被人罵才跟着我，要他這樣擔驚受怕地生活，我不想。MACK SIR教了我們很多很有用的方法，又教我們看書看VIDEO，學如何與狗相處。我們要教的東西很多，但起碼有了方法，有了指引。

現在他起碼會坐定定的聽我的指令，會坐下等我，之後的訓練漫漫長路，希望我的狗狗可以醒醒目目，順利過關。 

至於婚禮的事，到現在這一刻，我開始覺得其餘的都沒所謂，總之快快攪掂佢，唔好阻住我訓練隻狗~~ 哈哈!!!!!

新來口靚妹

2012年11月13日

今日見營養師嗰陣，spca打嚟問我得唔得閒做暫托，咁啱喺附近就即刻去接佢，係一隻一個月多d嘅貓b，原本係托另外兩隻，但因為要等睇医生而我又趕時間，所以變咗托呢隻。

我初初仲以為要托剛剛見報、俾人灌水沖落樓的貓仔，嗰隻而家喺醫院留醫。

貓仔好好中氣，全程的士不斷喵喵嘈，好用力叫~~希望佢快高長大。 

我是一pat泥

細佬足本傳神演繹「我是一pat泥」

活下去

今日發現左一件好烏龍嘅事，
原來美美係.....男仔!!!!因為佢個「姑姑」太細.... 我又睇唔到... 所以以為佢係女仔.......
hahahahahahahahahaaaa!!!!!
好啦，佢就改名叫吉仔啦，
希望佢可以自此吉吉利利，唔好咁黑仔啦!!

===================================================
走了美雅，來不及收拾心情，又來了一個新的寄住客美美。
昨天愛協打給我，說有隻受傷的小貓需要暫托，
小貓大槪4個月大，十日前剛剛做了駁骨手術，因為腳骨斷了。
而盤骨位置也有裂紋，所以這個月都不可以出籠，要留在小籠中過生活，待傷了的盤骨自然癒合。

獸醫千叮萬囑不可讓牠跳，因為若盤骨碎開，他便會collapse，到時便要人道毁滅。
所以，我照顧佢都要好小心，不過好在這隻不是一隻小小小貓，比較易湊，
送上靚相一張，
小貓貓，要快點好番啊!

復活奇遇── 一隻小小小小貓b

今個復活節，我有個奇遇，就係喺條街執咗一隻貓bb。

事緣，上周四，假期前最後一日返工，
嗰日成日落雨，天陰陰，
我行緊返公司，企喺到等過馬路嗰陣，聽到「喵喵叫」……
原來有隻貓俾人放咗喺紙皮箱，個箱貼左張紙寫住：內有貓貓，領養請自便。
我嗰時以為又有人棄養，望入去，見到隻貓得手掌咁大時，
心裏忍唔住「媽聲震天」……

我原本都唔想理，因為真係趕返工，但係佢又勁細隻，嗰日又落雨又凍，
於是惟有執左佢，放佢喺公司對面的寵物舖先，之後dinner時再飛的送佢返我家。

好彩隻貓b身體強壯，無cat flu，只係有好多蝨，
我平時都有做開foster parents(即係為被遺棄的小貓提供暫托)，都叫有經驗，
經過兩日觀察，見佢無乜嘢，我都忍唔住同佢清潔下先。

而佢好健康，到佢大槪一磅重時就會交給群貓會，接受領養。

其實我再諗返轉頭，可能放佢入紙皮箱的都未必係遺棄佢，
最大可能係佢一開始就係一隻街貓生，
唔知咩原因，可能係貓媽媽行開左，有好心人以為佢無人理，於是將佢拾起放箱俾人領養。

其實我想話，有時街貓有佢地的生存之道，
只要我們尊重佢地嘅生活，唔好搞佢地就得了，
有些其實不需要俾人領養的，
情況就好似你只不過出嚟行下街，但無啦啦俾人執咗去保良局一樣，
細細隻的貓bb可能只係出嚟玩下、散步，佢地可能有貓媽媽跟住，
貓義工好多時都只會把一些太親人的街貓帶回家俾人領養，
其餘的都係唔會捉啊。

講左咁多，俾大家睇下小小小貓嘅可愛bb相啦

佢有個名啦，叫美雅，英文名叫mia，因為佢成日係度「mia、mia」咁叫，
希望佢可以快高長大啦!

+++++++++++++++

2012年4月13日

今日好傷心。

再多的字都打唔出了。

美雅，RIP

在彩虹橋要快樂啊

我們這一家(前傳)

我們這一家有兩隻大帝，我這個貓奴，除了要做佢地嘅「執屎」之外，仲要每月上繳銀兩，為佢地嘅衣食張羅……
而家有請兩位大王大帝登場！！

■「尿」氏後人「尿帝」

本名「梓米」，時年5歲，女生男相，駙馬爺難覓。
最愛活動有季節之分，夏天愛咬膠袋，冬天愛瀨尿。
咬膠袋有原則，要有「索索」聲先咬，其餘的一屑不顧。
瀨尿亦有原則，重點是要在10度以下，瀨在全屋唯一的羽絨被上，最高紀錄試過一個冬天洗被錢達1000元!!!!!!
另一最愛：捐被竇。
當然，是等貓奴換走有尿的被後，才在乾淨的被內鑽。

■「癬」族掌舵「細佬」

本名「阿斤」，原買來入贅，可惜好景不常，「嫁入」家門後認魚唔認人，於是公婆只能做對掛名夫妻，最後還是稱兄道弟最適合。
當初回家即生癬，累得一家四口一齊身痕，因此亦有「癬王」之名，
平時最愛食，成世人得一項成就，就係識聽「魚魚」，一講即入廚房，萬試萬靈。

■掛名夫妻照

呵呵～～～
在此向各位打聲招呼，多多包涵！！！

打邊爐、去派對，食極唔肥法

好久沒有講餐單，今次係講打邊爐同去聖誕party嘅減肥方法。
首先講打邊爐先，因為天氣凍，唔打邊爐唔係人，所以我都會去打，上次營養師俾邊爐餐單我跟，大可以參考下。
朝早都要食早餐，可以食兩片麥包、同一片低脂芝士或一杯脫奶。
午餐都係食好少，可以食兩片麥包 / 2/3碗飯 / 1碗通粉，以及無限菜及1個生果。
重頭戲就係打邊爐，大家可以嚴選以下多款食物其中6樣：
2片牛 / 雞 / 羊 / 豬 /  豬潤
3隻蝦 / 3隻帶子
2件鮮魚片
3件蠔 / 魷魚 / 象拔蚌
1件豆腐
5粒牛丸 / 白魚蛋

以及以下3樣
1/4 碗烏冬
1/3 碗米粉 / 粉絲
1/3 碗米線
1/2 條粟米
14 扎芋絲

無限菜。

記得打邊爐時要用清湯底啊!! 這餐單是將全日的蛋白質攝取量放喺晚餐到，所以早午都要唔食肉，只係食五穀。

到聖誕派對，有係身不由己要去，所以大家食時都要注意一下，多食冷盤前菜，少食熱盤。
所有烤、燒、焗的都可以食，只要走汁就ok了。
大家要記住進食次序：清水 --> 蔬菜 --> 五穀 --> 冷盤 --> 熱盤 --> 水果

呵呵，我都有多個派對要去，又有自助餐要食，希望可以保持而家的體重啦~

減肥飲食技巧初體驗

我嘅減肥之路已經行咗一大半，療程亦只剩一個月都無，到而家為止，我由126磅，減到到115磅，2個月減咗11磅。

相比起我自己未參加之前亂咁減，已經係好好多，而且落磅落得好穩定，有時我都會偷食，好似我會食吓幾粒糖(尤其係姨媽到時，我仲更加嗜甜)，除咗中間有一兩個星期好反覆唔落磅之外，其餘時間都一直減，平均速度係3日減0.6磅。

營養師教咗我好多飲食技巧，呢啲技巧未必可以減到，但跟着做的話可以幫助保持體重，等我分享吓先。

首先係食嘢，我一直都覺得減肥要戒澱粉質係好困難，因為會成日都好似好肚餓咁，但原來只要啱份量係無問題，而薯仔又比白飯好，無咁高糖份，所以焗薯係可以食，只要不落牛油就可以了，另外減肥期要食包的話，嘉頓會係你嘅好朋友，因為我發現營養師提議食嘅都係嘉頓，好似english muffin、飛邊麥包、pita bread等，都係減肥之選。還有，芋絲都係減肥女人的好朋友，低卡又飽肚。

之後就到肉類，其實只要唔食肥膏，同啱份量，就咩肉都ok。我自己就梗係會prefer火雞肉，貪佢低脂，其次就係蝦。

生果反而要注意一下，因為原來唔小心食錯咗都好大鑊，最穩陣梗係食奇異困、蘋果同橙，蕉可以通便，但減肥其間一日只可以食一隻，牛油果、榴槤就要避啦。

至於蔬菜，所有深綠色嘅植物都可以多吃，菇類都可以，但係一到有根莖嘅(蘿蔔)或係果實類(蕃茄、南瓜)就要小心啦，多食會肥的。

出街食飯，就點食都肥，可免則免。不過免不過的話，就盡量揀輕嘢食。唔講唔知，原來營養師係唔建議食apple green的，因為用的source太heavy，佢竟然寧願我食切雞飯!!!! 

最後一點，其實減肥不宜食得太少，會減慢新陳代謝，反而減得仲慢。我就係一例，初時營養師就俾個正常小小嘅餐單我跟，一直減得好快，相安無事。之後一個月佢無啦啦俾d勁低卡餐單我，我無輕到不特止，仲要重咗少少又反覆。佢初初仲以為係因為我偷食，但後尾食番正常小小的餐單之後，我又好快落磅，結論就係太低卡令我新陳代謝減慢，反而減得仲慢咗。成個減肥過程，我覺得最重要都係做運動，如果只係跟餐單，我諗我唔會減到咁多，我有時會偷食，但做運動就絕對無偷懶，每次都做60分鐘帶氧運動，一星期至少3次，通常4次，所以落磅先會咁快。

希望以上嘅小小心得，幫到各位減肥中的女孩子啦! :)

激進蛋白餐

一排無記到個進展，其實都無乜大進展。因為到咗疑似平台期，我由126磅減到而家118磅附近，今日117.8磅，用股巿術語講就係「徘徊待變」。
之前，營養師俾咗個「好啃」嘅餐單俾我，就係蛋白餐，每餐食好少，加上我姨媽到，結果血壓偏低，所以即刻食番正常，寧願做多d運動，而仲好一點。
蛋白餐其實就係三餐食兩隻蛋白，唔食肉，早餐就有兩片麥包、午餐都有三份穀，但晚餐除咗菜之外就乜都無。
真係好低攝取量，我就跟咗一日之後頂唔順，頭暈。

之後，我仲有三文治餐啦、高纖餐、茄汁豆餐、壽司餐，好多花款。其實全部都有唔同作用，有d係去水腫、有d去便、有d係低脂。所以我覺得俾錢跟佢，就係貴喺呢度，有人調節餐單。

今日見營養師，俾佢知道咗我有時一日只係食咗兩餐，有一餐無食到，我以為食少d會減得再快d，但原來係唔得，食得太少令新陳代謝慢咗，得不償失，所以佢千叮萬囑我一定要食三餐。我還有意外收獲，上次營養師叫我買維他命丸食，我係完全無咗件事，佢今日送咗一大樽俾我!!!!!

每日食一粒，我真係從未試過咁健康，多謝晒~~~~

運動減肥要識計數先work

自9月25日跟隨米記減肥開始，直到現在上次10月24日磅重，我減掉了6.5磅，就是我家大肥貓阿米一半的體重，哈哈哈哈 (認真想想，阿米大帝都要認真減吓肥了…)。營養師說，我的case進度非常好，雖然仲有11磅要減，而第二個月先係真正的挑戰開始，因為惰性開始發作，而三分鐘熱度開始減退，為了提醒自己要努力，我在iphone set了一張試婚紗時的虎背熊腰相做wallpaper，時刻提醒自己，不可再變回那個自己，要將頑固脂肪減掉。

今日見了運動教練，學識了怎樣做運動同點計消脂。有做開運動的人一定有聽過，好多人都話「做運動要做X分鐘後先開始消脂」，而中間的X，有啲人話15、有啲人話20，有啲人話30，仲有啲人話係45!! 我一直都好唔明……直至今日，我明了。

所有人講的X不同的原因，是因為中間夾雜了兩個不確定因素，就是心跳率及年齡。

原來每個年齡組別都有一個「消脂」心跳率，計算程式是：(220 - 年齡) X 60%至80%=你的消脂心跳率

只要到這個心跳速度，開頭20分鐘，身體會先消耗肝糖，之後便消耗脂肪，所以該20分鐘不是一開始就計的。但要做多久運動才到自己的消脂心跳呢? 就人人不同了。有些心肺功能好的人，可能要做好久才能到達該心跳速度，又有些人整天說自己做運動都減唔到，都是因為他們沒有量自己的心跳吧。而我今日做完心肺功能TEST，結果係「差到OUT RANGE」，教練都窒一窒，若然有分GRADE，我嘅心肺功能一定係U。不過阿Q精神嘅我，會諗我只要跑一分鐘就可以開始消脂啦，HAHAHAAHA。

由於我心肺功能太差，教練就建議我做運動以自己舒服為主，礕如跑步，可以跑慢D，但跑耐D，這樣反而消脂得更多。

今日的半個鐘，我真係獲益良多呀。