2014年3月11日 星期二

學車,二萬與三千的分別

今次真係瀨嘢。

我4月2日考車,早於過年前在網上找了個師傅學,至今上了5堂課,終於明白點解駕駛學院收人兩皮嘢都仲咁多人報,只因出面街的師傅太良莠不齊,太多陷阱,我自己就係一個例子。

我過年前1月已經找師傅,打算2個月密密學點都學識。

之不過,我個如意算盤錯晒。

1. 約咗都改你堂
明明一早約好的時間,佢一個電話話要改就改,有一次仲要直接cancel我的堂!! 如果我係遲考就算,但我4月2日考,我連彎都轉唔到,仲要掉走我啲堂。到而家為止我只係上咗5堂,但仲未出過去考試條路,你話死未?

2. 指明要A師傅,變咗B師傅
呢樣嘢真係好過份,學車揀都係揀師傅,我面皮薄,所以師傅一定唔可以惡,於是我就指明要A師傅,我問的時候佢話「頭兩堂都係學基本嘢,阿B師傅會教你,之後就會我教番。」但現實係,我上咗5堂,A師傅只係上咗2堂,其餘都係B師傅教,之後大部份都係B師傅教,B師傅年紀大唔耐煩,未開車就鬧人,痴線!!要求轉人,A師傅又話唔得閒,不負責任。

3. 道路夜晚先准學,但佢無空檔
我唔知原來培正道係要夜晚先可以練車,但我夜晚要番工,咁正常人等都唔可以係咁請假學車,只可以喺放假的時候學。我一早問個師傅,佢又唔同我講,報價時問我想幾點學,咁我咪答佢晏晝。但原來晏晝只係喺九龍塘學,要去試場就係要夜晚。我即刻好驚,仲要我唔搵佢佢唔搵我,我主動搵佢,佢話你密D學啦,但係同佢夾時間佢又無,你話點算。

基本上,而家我係兩頭唔到岸,唔知考好定唔考好。

回帶睇番我老公,佢報駕院,時間易約、學車歷程清晰,先唔好講師傅質素,淨係約時間已經煩少好多嘢,大家有個PLAN,我心中都有個底。但佢就係貴,2皮幾嘢。

之但係,我呢D返工一族,時間束縛大,約時間係好重要,對比而家,我都唔知我點算。

我奉勸各位,可以按自己情況,如果你係時間很自由的人,不妨平啲搵街師傅,但若果你好似我咁,時間有限制,真心勸你唔好博。

我而家打定輸數,學到4月1日睇情況,睇下自己學成點,考唔到,就惟有再嚟過,但發誓一定唔會再跟師傅。


4 則留言:

  1. 吓, 兩個月學識, 哩班師傅真係呃你!!
    我果時都係搵師傅學, 果位師傅講明要半年前搵佢, 指明要學30-40個鐘先好去考試,
    其實搵師傅比駕院學, 係會多路面經驗, 因為好多朋友係駕院學完, 初初好怕行路面架!!
    不過搵師傅真係最好搵朋友介紹!!

    回覆刪除
    回覆
    1. 原本佢地話好密集咁學,例如一個星期上3次, 每次3堂,係可以的,但問題係佢收咗我錢之後就無時間!!! 一個星期先夾到一堂,我就p晒k,唉~~

      刪除
  2. 睇完你咁講, 我真係有D擔心, 因為我7月考, 下個會約師傅練車~我都好擔心好難約~~
    BTW, 我都係考培正道

    回覆刪除
    回覆
    1. 其實培正應該唔難考,但佢好多路段都要夜晚先俾練,但我夜晚返工。 x_x'''
      而我所有得的時間個師傅都唔得,約咗都cancel我堂。所以真係瀨嘢。

      我決定要延期同改考港島線。因為我搵到個好師傅,我寧願跟個夾,反正試道唔會差好遠,反而係交通情況先係令人肥的原因。

      你加油!!

      刪除