大阪plan吓睇吓

9月去大阪，但我又係乜都未book。

全因我唔係好搞得清d地理位置。

因為我同羊生都係好懶嘅人，所以即使係旅行，都會瞓到日上三竿先起身，即係大約11點到啦，所以我地個行程係好唔同，唔可以好似人地咁橫掃唔多區同地方。我嘅目標係要去大阪、有馬同京都，其他奈良、神戶等等就下次先，上次去東京，太貪心，plan一日去個地方，行到個人short咗，旅行唔應該咁趕，尤其係自由行，所以今次我決定hea吓、歎慢板。

今次旅行嘅目的係食。

所有必食之店已盡在我手中，原來難波、三彡站都好多好嘢食，有人仲話有一些店唔食就等於無去過大阪( 咁嚴重?! )

問題嚟啦，原本旅行社的人叫我先去京都，再去溫泉，最後先殺去大阪。

但係......

我咪要攞住d行李周圍走?!! 唔制~~

我知道難波車站有行李寄存locker，但係要長途拔渉拖個喼去個車站，要知道日本人真係「好健康」，佢地d車站要行n咁多路，先到地面，好鬼遠，所以我都係唔想拖嚟拖去。同精明嘅表姐商量之後，決定揀大阪做中心點，行程如下：

大阪(2日) --> 有馬 (1日)  --> 京都 ( 2日 ) --> 大阪(3日)

成個行程最期待去有馬，好想食正宗溫泉蛋，京都都好期待，大阪就好似東京差唔多，唔會有乜特別，所以都係放最後去。

而家我只係諗到咁，斷估酒店可以俾我寄存3日行李，而家就要book機票、酒店。

有blogger推介新怡、又有人話可以直接上酒店book，機票就分開買，但我而家咁住，唔知點買好。

最近睇到一個名為「輕淑女」的blog，佢剛剛去完關西回來，篇分享好有用，大家可以睇吓呀
http://blog.yahoo.com/_Y77XFVVTAEITSZYS4424RDAX4Y/articles/1180386/index

我要再研究研究~~